سمية الخشاب: انا متأكدة على تعمد الأذية بـ" رامز جاب من الآخر".. ورفعت قضية

كتبت - أميرة محمد 

كشفت الفنانة سمية الخشاب عن إصابتها في برنامج "رامز جاب من الآخر" خلال لقائها في برنامج "تفاعلكم" على قناة العربية.

وقالت سمية الخشاب: "هما قصوا كتير جدا ليا وأنا بقول رجلي بتوجعني وكتفي وجعني، ولحظة وقعتي كانت وقعة قوية بس هو قص كتير عشان ميبانش إن أنا اتصابت".

وتابعت: "وأنا عندي تمزق في الأربطة في رجلي في كتفي ومش بعرف أحرك إيدي بارتياح".

وأضافت: "اللي يزعل ان ولا حد منهم كجهة انتاجية اتصل بالناس وقال سلامتكم أو أسف. هو احنا في غابة يا جماعة؟".

واستكملت: "مش مهم الناس يحصلها ايه المهم أطلع أنور وأعمل مشاهدات عالية؟ المهم مصلحتي والباقي يتحرق؟ ايه اللي بيحصل دة دة مهزلة لا يمكن السكوت عليها".

واشارت: "الناس تتؤذي في صحتها، ما أنا عملتها معاه 4 سنين قبل كدة بس كنت عارفة إيه اللي بيحصل لكن المرة دي متقالش".

وأضافت: "عشان في تعمد للأذية يبقى انت كدة متعمد تؤذي الناس، دي جريمة يعاقب عليها القانون. قالي إنه برنامج عادي فورمات".

كما قالت: "متأكدة ان في تعمد في الأذية والدليل إن مفيش حد اهتم إنني اتصابت، ولما رحت للمستشفى قالولي انت مش أول حالة، امبارح جالنا 3 حالات من عند رامز". 

وأوضحت: "أقل حد اتصاب حصله كدمات متعددة في جسمه. معقول انتوا عارفين بتكسروا في الناس كل يوم ومكملين تصوير؟ وقال أصل الناس ماضية على إنهم موافقين على جميع الملابسات والظروف الخاصة بالبرنامج. يعني ايه؟".

واستكملت: "أنا موافقة إنني اتكسر؟ أصلا مفيش عقد بيننا بس لو حتى فيه عقد، جسمنا دة مش ملكنا، دة ملك ربنا، فمش من حقك تؤذي جسمي صحيا ونفسيا وعصبيا، فدة ضد حقوق الانسان وضد القانون".

وأكدت: "أنا رفعت قضية فعلا ومن تاني يوم وأنا عاملة إجراء وفي طلب للنائب العام إن ينظر للموضوع". 

وتابعت: "أنا متأكدة إن في ناس اتصابت ومش عايزين يقولوا عشان خايفين MBC تزعل منهم بس".

وأضافت: "هي قناة محترمة وهي بتعرض البرنامج ومش الجهة المنتجة له. انا يعني صحتي دي محدش هيزعل عليها؟ كله إلا الأذية".