سلمى أبو ضيف: لسه مش مستوعبة نجاح "أعلى نسبة مشاهدة"

كتبت - أميرة محمد 

أعربت الفنانة سلمى أبو ضيف خلال لقائها مع برنامج ET بالعربي عن سعادتها البالغة بنجاح مسلسل "أعلى نسبة مشاهدة"، مؤكدة أنها لم تستوعب حجم النجاح حتى الآن.

وتابعت: "كان نفسي أعمل بنت شعبية، ولما جاتلي الفرصة السنة دي والسنة اللي فاتت عملت حاجة مختلفة عني في المداح".

وأضافت: "والناس صدقتها، وده اداني ثقة إني لما أدي مجهودي في الشخصية مع توجيهات مخرج شاطر بيطلع حاجة كويسة".

وعن عدم ظهورها بمكياج خلال أحداث مسلسل "أعلى نسبة مشاهدة"، قائلًا: "أنا ظهرت في أعمال كتير من غير ميك آب".

وأشارت: "وأنا مبحطش ميك آب في العادي والمخرجة كانت طالبة محدش يحط ميك آب".

وتابعت: "واحنا مكنش عندنا ولا ديكور واحد وكل المسلسل كان متصور في شوارع حقيقية، وبيت الحطابة اللي صورنا فيه وحشنا وهو بيت أثري".

وكشفت عن تفاصيل تحضرها لدور شيماء في المسلسل قائلة: "أول ما جالي دور شيماء اتخضيت لأنه بعيد عني".

واستكملت: "والمخرجة شافت بنت اسمها مي في الحطابة مكان البيت اللي صورنا فيه".

وتابعت: "وهي بصراحة جدعة جدًا وكانت معايا في كل لحظة في التحضير، وساعدتني كتير في طريقة الكلام والتكوين".

واستكملت: "وكنت بروح عندها أكتر من مرة وقعدنا بالساعات وطريقة شرحها كانت لطيفة جدًا، وقالتلي البنت الشعبية بتتكلم بـ إيديها".

وعن تعاونها مع ليلى أحمد زاهر فقالت سلمى: "ليلى زاهر هي أختي الصغيرة، وموهوبة جدًا، وشقية في الحقيقة ودمها خفيف".

وأضافت: "وكنت برجع كل يوم من التصوير بقول الحمد لله، لو حد بيعيش حياة شيماء دي حياة صعبة، دي من الدار للنار".