ريهام حجاج تدافع عن "صدفة": مش كل الناس صح

كتبت - أميرة محمد 

ردت الفنانة ريهام حجاج على انتقادات مسلسلها الأخير "صدفة" الذي عرض في الموسم الرمضاني الماضي 2024.

وفي مداخلة هاتفية مع الإعلامية لبنى عسل في برنامج "الحياة اليوم" المذاع على "الحياة"، قالت ريهام:

 "ربنا سبحانه وتعالى مش كل الناس اتفقت عليه، فمش كل الناس صح ومش كل الناس نظرتها للأمور زي بعض".

وتابعت: "مبسوطة بحالة الجدل الكتيرة دي، لأنه صدفة شخصية مش هتقابلها كل يوم، وعندنا رسالة عايزين نوصلها للناس إن صدفة شخص غير سوي بسبب نشأتها".

وأضافت: "وإحنا كنا عايزين نقول للناس مترموش عيالكم، لأن لما ترموا عيالكم يا هيطلع طفل عنده اضطراب نفسي زي صدفة".

واستكملت: "يا حد مش طبيعي، وواحد مبيعرفش يفكر كويس، وديمًا أفعاله غلط ومش بيعرف يحل المشاكل، ومعندوش توازن حتى في لغة الجسد والكلام".

وأوضحت: "وكان فيه رسالة مهمة برضه أن أنت مينفعش تختار تربي مين ومتربيش مين من أولادك، فكنا عايزين نقدم رسالة للناس أنه نربي ولادنا".

كما قالت: "أنا مخفتش من الدور وتحمست جدًا ليه، وكنت مبسوطة أوي، ومستمتعة وأنا بمثل".

وأردفت: "وفي خلاف من بعض المدرسين، وأنا حابة أقول حاجة، أنه إحنا مبنقدمش مهنة، إحنا بنقدم بني آدم لحم ودم، ومالهوش علاقة بـ المهنة".