مروة عبد المنعم تكشف سر ارتداء الباروكة: سقط شعري ووصلت لـ 70 كيلو

كتبت - أميرة محمد 

تصدرت النجمة مروة عبد المنعم قائمة الأكثر بحثًا على منصة جوجل، بعد كشفها عن أزمتها النفسية الأخيرة التي دفعتها إلى ارتداء الباروكة في الفترة الماضية.

ووجهت عبد المنعم رسالة لمتابعيها عبر حسابها الرسمي على فيسبوك، كشفت فيها عن تفاصيل ما مرّت به.

قائلة: "وأخيرًا إفراج نهائي من الباروكة، بعد دوامة نفسية سيئة جدًا دخلت فيها، وصلتني لـ 70 كيلو وسقوط شعري بالشكل ده".

وتابعت: "اضطريت ألبس فيها الباروكة.. وواحدة واحدة بدأت أفوق بفضل ربنا وأرجع لوزني وشكلي".

واستكملت: "لكن فضل شعري في الأزمة، طبعا لم يعالج بنسبة 100%، بس أخدت الأمر بالإفراج عنه وتكملة العلاج عادي".

وأردفت: "أنا كان فيه ناس كتير بتقعد تقولي أنت لابسة باروكة ليه شكلك مش حلو فيها، بس ماكنتش عاوزة أقول وقتها ولا عايزة أتكلم".

وأوضحت: "بس كان الكلام بيوجعني قوي ويزعلني على نفسي جدا، الخلاصة يا جماعة.. محدش ينقد حد على شكله.. محدش عارف جوه الكواليس فيه ايه".

كما قالت: "بلاش نقد وتعليقات، دلوقت أنا أقدر أقول وأتكلم ولا أخجل، أنا مريت بأزمة نفسية كانت صعبة علي جدا".

واستكملت: "عمري ماكنت أتخيل أن الوجع النفسي ممكن يدمر بالشكل ده، لحد ما عشته وجربته". 

وأضافت: "بس اللي كان بيوجع أكتر هو تدخل الناس في شكلي ولبسي للباروكة".