تامر ضيائي يودع الحياة بعد صراع مع المرض

غيّب الموت الفنان تامر ضيائي، اليوم الأربعاء، عن عمر يناهز 50 عامًا، بعد صراع طويل مع المرض.

وأعلن الفنان عمرو عبد العزيز، وفاة ضيائي عبر حسابه الرسمي على إنستجرام.

قائلًا: "لله وانا اليه راجعون كده يا تامر تمشى فجاءه كده و تخضنا كلنا، لا إله إلا الله.. الله يرحمك يا حبيبى ويجعل مثواك الجنه يارب العالمين".

وفي وقت سابق كشف تامر ضيائي عن وصيته عند مماته عبر حسابه على فيسبوك.

وكتب ضيائي في منشور مؤثر، تأثرًا بالمرحلة المرضية التي تعرض لها مؤخرًا: "ده هيفضل باين على صفحتي لحد ما أموت.. الحقيقة اللى كلنا عارفينها ومتأكدين منها إننا كلناربنا كتبلنا إننا نموت".

وتابع: "فى ميعاد محدد غير معروف، وعشان كده كتبت الكلام ده لأني محتاج حاجات معينة تتعمل وحاجات خايف تتعمل".

وأضاف: "وأنا مش عايز حد يعملها لمجرد إنها معروفة، ووقتها طبعاً مش هعرف أقولها لحد".

تامر صيائي يوصي بصلاة الجنازة عليه

واستكمل تامر ضيائى: "ودي وصيتي.. أولاً صلاة الجنازة أهم من العزاء وهى اللي كل ما العدد زاد كل ما ثوابي ما كان أكتر، فأرجوكم تصلوا عليا".

وأشار: "وثانياً مش شرط تيجي العزاء وياريت لو اتعمل في البيت أو مكان بسيط بفلوسه تطلعولى صدقة جارية أفضل".

وتابع: "وثالثاً من فضلكم لم يثبت أو يتفق عليه عمل خاتمة قرآن للمتوفي إنها هتوصله، بس مثبت إن الدعاء والصدقة بيوصلوا للميت".

وأردف: "فرجاء دي بالذات بلاش وادعولي الوقت اللى هتقروا فيه جزء فضوا نفسكم واقعدوا ادعوا فيه".

تامر ضيائي يوصي بالصدقة بالجارية

وأضاف: "رابعاً بلاش صدقة جارية تقليدية وسهلة ومش مستفاد بيها، يعني المصاحف كتير فى مصر أوى وكل بيت فيه كتير، فممكن نحط الفلوس فى جامع بيتبني أو كرسي متحرك فى مستشفى".

وقال: "يستفادوا بيه المرضى أو دخول مياه لبيت غلابة أو بناء سقف لبيت فقراء، حاجات ناس تستفيد بيها لمدة طويلة".

واستكمل: "خامسا دي نقطة مهمة أوي بالنسبة لي.. محدش يقول لحد بتعيط علي ليه، ومتعيطش عشان هو بيتعذب!! الكلام ده غلط، سيبوهم يعيطوا لحد".

وتابع: "ما يطلعوا كل الشعور اللى عندهم ومفيش حاجة بتقول إن العياط معناه عدم رضا بقضاء ربنا “وابيضت عيناه من الحزن فهو كظيم”".

وأضاف: "وسادسا أهم حاجة تانى هى الدعاء وبس والصدقة، وسابعا من فضلكم تكثفوا الدعاء وقت نزول القبر".

وأشار: "وتتصدقوا بأى حاجة بنية إن ربنا يجعل قبرى روضة من رياض الجنة ويثبتني عند السؤال".

وأردف: "لأن ده أهم وقت ليا وياريت كمان بعد ما تدفنوني تقعدوا معايا شوية ومتستعجلوش تمشوا عشان تونسوني فى ليلة زي دى".

وتابع: "وثامنا الموت علينا كلنا حق واحنا كلنا أمانات ربنا وهيردنا تاني، فالحزن على الفراق هونوه على نفسكم بالدعاء لي".

كما قال: "عشان أبقى في سعادة لحد ما أقابلكم تانى، وتاسعا اللي بيحبوني يدعولى كتير عشان لو مفيش حد يدعيلى".

وأوضح تامر ضيائي: "وعاشرا ودي مهمة أوي أوي أوي عاوز الكل يسامحني على أي حاجة عملتها فيه بقصد لو بدون قصد".

وأردف: "اللهم إن كثر موت الفجأة من حولي وكثر موت الشباب غفلة، فيارب إن كنت أنا القادم فأحسن خاتمتي ويسّر طلوع روحي وهوّن عليّ سكراتي".

واستكمل: "فإني أحب أن أرحل في هدوء وسكينة وطمأنينة، ولا تقبض روحي إلا وأنت راضٍ عني لكي أكون عبدا مقبولا عندك حتى أليق بلقائك العظيم".

وانهى تامر ضيائي كلامه قائلًا: "وإن كان لي من العمر باقٍ فاغفر لي ذنوبي ومعاصي نفسي الأمّارة بالسوء واعفو عني وامحو لي كل ما يعرقل طريقي إليك وردّني إليك ردّاً جميلاً يا رب العالمين".