من «الحريفة» لـ بطولة مطلقة.. كزبرة يكشف أحدث أعماله 

أعلن الفنان كزبرة، عبر حسابه الرسمي على "فيسبوك"، عن تعاونه مع المنتج طارق الجنايني في فيلم جديد يحمل عنوان "أوڤر سايز".

وكتب كزبرة: "توكلنا على الله، استنونا في الصيف الجاي فيلم "أوڤر سايز"، شخصية عماد البطيء".

وتابع: "خطوة مهمة جدًا مكنتش هقدر أخدها من غير دعم أخواتي وإيمانكم بيا ويارب يعجبكم، إنتاج طارق الجنايني إخراج كريم سعد تاليف إياد صالح.

يأتي هذا الإعلان بعد النجاح الكبير الذي حققه الثنائي في أجزاء فيلم "الحريفة"، مما يؤكد قوة شراكتهما الفنية.

أحداث فيلم "الحريفة 2"

وتدور أحداث "الريمونتادا" بعد فوز فريق "الحريفة" بالبطولة، حيث يتحدون لاستكمال حلمهم وتحقيق المزيد من الإنجازات.

أبطال فيلم "الحريفة"

وشارك في الجزء الأول من فيلم "الحريفة" عدد كبير من النجوم وهم  نور النبوي، أحمد غزي، كزبرة، نور إيهاب، خالد الذهبي، عبد الرحمن محمد، سليم الترك، وآخرين.

مع ظهور خاص للنجم بيومي فؤاد وشريف الدسوقي، ومن المقرر أن يضم الفيلم تواجد نجم الكرة السابق العالمي أحمد حسام ميدو، كممثل لأول مرة داخل العمل.

الفيلم من تأليف إياد صالح، وإخراج رؤوف السيد، ومن إنتاج شركة "تي فيجن" طارق الجنايني.

تدور أحداث فيلم "الحريفة" حول ماجد لاعب كرة القدم الذي تدفعه الظروف العائلية إلى أن ينتقل من مدرسته الدولية إلى مدرسة حكومية.

وهناك يتعرف على مجموعة من زملائه من خلفيات مختلفة، وينضم لفريقهم الذي يشارك في مباريات بالساحات الشعبية ومراكز الشباب ومعاً يحلمون بأن يشاركوا في بطولة كبيرة جائزتها مليون جنيه.

كزبرة يرد على سخرية محمد رمضان

وفي وقت سابق رد كزبرة على سخرية محمد رمضان منه. 

وقد بدأ الخلاف مجدداً بعد أن احتفل كزبرة بعرض فيلمه الجديد "الحريفة" بعد سؤاله عن هل هناك خلاف مع محمد رمضان ليرد قائلاً: "حبيبى لو زعلان البحر هناك مليان".

وعندما وجه أحد الأشخاص بسؤال محمد رمضان أثناء حضوره بمقر سينما راديو في وسط البلد، عن كزبرة، رد عليه محمد رمضان قائلاً: "إحنا هنا في مكتبة مش في محل عطارة"

دفعت هذه التصريحات كزبرة للتعبير عن حزنه من هذه المواقف عبر حسابه على موقع التواصل الاجتماعي "فيسبوك"، قائلاً: "والله يا جماعة الكلام ده نفسي أقوله من بدري بس حاسس إن وقته، أنا مش عارف ليه كل ما أنجح في ناس بتحاول تطلع صورتي وحشة".

وتابع: "أنا بجد نفسيًا مبقتش قادر وبقالي فترة كبيرة كل لما أعمل حاجة حلوة مبقتش عارف اتبسط بيها ونفسيًا مش أحسن حاجة، وربنا اللي عالم الواحد كل اللي يهمه أنه يقدم حاجة تعجبكم وتسعدكم".

واستكمل: "بس في ناس بتتعامل مع اللي بيقدم حاجة كوميدية على أساس أنه شخص تافه مش موهوب، والواحد عشان بيتعامل بطبيعته ومش بيتصنع بتحاولوا تشوفوا إزاي تطلعوا في عيب قدام جمهوره وإخواته اللي بيحبوه".

واستكمل كزبرة: "زي ما بيتنسب ليا كلام مقلتهوش أو يتقلل مني بحاجات قديمة عملتها وأحيانًا بتوصل للتريقة على اسمي بمجرد ما يعمل حاجة حلوة وتعجبهم".

وأشار: "أنا مش عارف ليه وده السبب اللي بيخلي إنسان طيب أول لما ينجح يتحول لإنسان عنده نقص وعنده حرب مع كل اللي حوليه، زي ناس كتير نجحت وبقوا بيتعاملوا بنرجسية عشان يعرفوا يتعاملوا مع الواقع".

وأضاف: "أنا يا جماعة مش عايز أوصل للمرحلة دي، أنا عايز أبقى إنسان طيب وفي حالي وأشتغل على نفسي وأقدم لكم فن يعجبكم ويبسطكم، هو ده هدفي فبلاش تتعاملوا مع الواحد بأسلوب هو مش حابه،".

وتابع: "وشكرًا لكل واحد بيدعمني من قلبه وأي حد بيحب اللي بقدمه أو حتى بينقده بأسلوب كويس، أنتم اللي تهموني وشكرًا".

وأضاف: "في الآخر في قصص نجاح ملهمة كتير تستاهل الناس تتكلم عنها ممكن تفيد الناس أكتر من قصة أحمد بحر كزبرة".

واستكمل: "وإزاي وصل لهنا، وهكون أسعد كتير لو كان التركيز على شغلي مش على شخصي، سواء بالإيجاب أو بالسلب علشان أتعلم وأطور نفسي في اللي جاي".