الزمالك: استبعاد زيزو من قائمة مباراة ستيلينيوش بالكونفيدرالية بسبب أزمة التجديد
أكد مصدر في نادي الزمالك أن الجهاز الفني للفريق بقيادة البرتغالي جوزيه بيسيرو قرر استبعاد زيزو لاعب الأبيض من القائمة التي ستخوض لقاء ستيلينيوش الجنوب أفريقي المقرر له غداً الأربعاء في إياب دور الثمانية لبطولة كأس الكونفيدرالية الأفريقية.
أزمة تجديد زيزو مع الزمالك
وأضاف المصدر أن الاستبعاد جاء بسبب أزمة تجديد اللاعب مع الزمالك والتي تزامنت مع إنتشار أنباء قوية بتوقيع زيزو للأهلي.
ويستعد الزمالك لمواجهة سيليتنبوش الجنوب أفريقي غداً الأربعاء على ستاد القاهرة الدولي في إياب دور الثمانية لبطولة كأس الكونفدرالية الأفريقية.
جدير بالذكر أن لقاء الذهاب الذي أقيم في كيب تاون يوم الأربعاء الماضي كان انتهى بالتعادل السلبي بين الفريقين.
وخرج أحمد مصطفى "زيزو" نجم الزمالك عن صمته قائلاً: أنه لم يوقع لأى نادى، مؤكداً أنه يحترم كيان القلعة البيضاء الكبير.
بيان رسمي من زيزو
ونشر زيزو عبر "استورى إنستجرام": "الحمد لله أنا راجل بحترم كل الناس.. لكن للأسف عدم ردى على المعلومات المغلوطة. والتزامي الصمت زاد عن حدة وكل ساعة خبر عن توقيع أو تجديد عقد زيزو وكل واحد بيغازل الشريحة اللي عايزها من الجمهور".
تابع: "بكل وضوح أنا لم أوقع لأى نادى سواء داخل أو خارج مصر. اللي حصل على توقيعي يتفضل يعلن.. إذا كان كلامه صحيح، كمان اللى عنده دليل على توقيعى لأى نادى برضو يتفضل يطلعه على الملأ.. الناس لازم تعرف كويس".
وواصل: "أنا بقدر جدا الكيان الكبير اللي أنا بلعب فيه.. ولا يمكن أنكر فضله عليا. لكن فيه حاجة أنا مكنتش حابب أتكلم فيها خالص.. لأنه للأسف الأمور في الإعلام كلها في اتجاه واحد.. ليه محدش اتكلم عن حقوقي المشروعة زي أي لاعب في الدنيا".
وأكمل: "ليه محدش اتكلم إن الناس سابتنى بقالها شهور طويلة ومش عايزين يجددوا عقدى. ليه محدش اتكلم عن المستحقات المتأخرة اللي ليا بقالها كثير. ومش لاقي حد".
واختتم: "محدش كمان اتكلم أنه ربنا سبحانه وتعالى أنعم عليا بعروض مقابلها المالي 10 أضعاف العرض اللي موجود.. ورغم كل ده. قلت وهفضل أقول أنا منتظر كلمة النادي. ورد لاعتبارات كتير مش لتجميل الصورة.. الجماهير لازم تكون عارفة الحقيقة.. زيزو مش بيزايد.. ولا بيتاجر.. لكن لازم الطرف الثاني يكون عايزني أكمل.. وتكون فيه استجابة لحاجة من المعروض عليا على الأقل.. لكن للأسف الكلام معايا حاجة.. واللي بيتقال للإعلام حاجة تانية.. أنا مينفعش أجرح في حد ولا أتكلم في حق حد.. لأن اللي بيتقال في الجلسات عيب يتقال برة.. على الأقل من ناحيتي.. أنا مستني رد النادي لحد آخر يوم في الكونفدرالية.. وأتمنى ربنا يكرمنا بيها أنا وزمايلي. وأي كلام هيتقال غير كدة في موضوع التجديد أو التوقيع قبل الموعد ده . هيكون كلام غير صحيح. ورسالتي الودية جدا للمسئولين في النادي اللي أنا بحترمهم جميعا.. أتمنى الحوار في مسألة تجديد العقد يكون بيني وبينكم.. مش عن طريق الإعلام.. وأنا كنت ولا زلت واضح معاكم في كل اللي اتكلمت فيه من أمور عادلة تساعدنا على اننا نكمل الطريق. شكرا على تفهمكم موقفي"
وفي وقت سابق، صرح مصدر في النادي الأهلي أن الحملة الإعلانية رجحت كفة ناديه للتعاقد مع أحمد مصطفي زيزو نجم الزمالك ومنتخب مصر، مضيفاً أن أموال الحملة الإعلانية ستكون خارج قيمة تعاقد زيزو مع الأهلي حتي يحصل اللاعب علي المبلغ الذي أراد الحصول عليه لاتمام الصفقة.
وأوضح المصدر أن صفقة انتقال أحمد مصطفى زيزو لاعب الزمالك إلى القلعة الحمراء حسمت ، مُشيراً إلى أن الأهلي أنهى جميع الاتفاقات المالية مع اللاعب ووالده الذي يقوم بدور وكيل أعماله.
