"المرأة والأم والزوجة مش عنصر هامشي"..مني ذكي توجه رسالة لجمهورها

كتبت-زينب سعيد

نشرت منى زكي عبر حسابها على Instagram، رسالة إلى جمهورها لتشكرهم على دعمهم ورسائلهم لها بعد عرض مسلسل "تحت الوصاية".

ووجهت الشكر لكل فريق عمل المسلسل، متمنية أن تكون الرسالة التي قدمتها وصلت للجميع وأن يتم تغيير القوانين.

وكتبت مني ذكي: "مع انتهاء موسم رمضان حابه أوجه الشكر لجمهوري في مصر والوطن العربي كله على كل التشجيع والحب اللي وصلني منكم.

" شكرا لكل شخص أخد من وقته وكتب كلمة حلوة عن مسلسل تحت الوصاية..

وأحب كمان أوجه الشكر لناس كتير جدا بداية من المخرج العظيم محمد شاكر خضير اللي عارف اللي في قلبي تجاهه وقد إيه هو فنان موهوب وعنده رؤية وحساس جدا.

وتابعت: بشكر المنتج الكبير محمد السعدي وشركة ميديا هب، وخالد وشيرين دياب على الفكرة والموضوع والإبداع اللي مش جديد عليهم.

وأكملت: وقبل أي حاجة بوجه الشكر طبعا لزمايلي في المسلسل اللي كلهم معجونين موهبة ولولاهم مكنش تحت الوصاية ظهر بالشكل ده.. هما كتلة من المواهب المتحركة وعاشقين للفن.

وأخيرا مش ممكن أنسى أهالى عزبة البرج وأجدع صيادين في مصر..واللي حسسوني أني بقيت واحدة منهم طول فترة استضافتهم لينا.

واختتمت كلامها:فرحت بتعليقاتكم وتفاعلكم مع المسلسل، وأتمنى إنه يكون نقطة بداية لإعادة النظر في قوانين الوصاية.

"الزمن بيتغير والأوضاع بتتغير والمرأة والأم والزوجة مش عنصر هامشي، دي الأساس اللي قايم عليه كل البيوت، وكذلك الأب.

ونتمنى من المشرّع إعادة النظر في قانون الأحوال الشخصية عشان نحفظ حقوق الأولاد والآباء والأمهات.