دينا الشربيني تكشف تفاصيل مكالمتها مع الداعية مصطفى حسني.. بكلمات مؤثرة

كتبت-زينب سعيد

صرحت الفنانة دينا الشربيني خلال لقائها في برنامج "كلام نواعم" عبر قناة mbc 1، عن تفاصيل مكالمتها للداعية الإسلامي مصطفى حسني لتسأله عن حالة السكينة والهدوء التي تشعر بها بعد وفاة والدها.

وقالت: "كلمت مصطفى حسني عشان بحبه وقولتله أنا مش عارفة أنا في إيه وحكيتله إحنا إزاي كنا قريبين من بعض.

 قالي غالبا باباكي كان بيدعي أن لو جراله كده ربنا ينزل على قلبك السكينة، وحقيقي دا اللي مخليني عايشه".

واستكملت: "أبويا هو حياتي، الموضوع جيه بطريقة غريبة بابا مكنش تعبان في ساعتين أنا مش فاكراهم خالص هما بيحكولي عليهم كنت بتعامل أن الخبر مش حقيقي وبقول مش هو".

وتابعت:" أنا مش فاكرة الجزء دا حصل إيه، بيحكولي حاجات كأن واحدة تانية عملتها.

فوقت وأنا بقوله في ودنه أشهد أن لا إله إلا الله.

وحسيت بحاجة غريبة أن روحه جوايا وحسيت بسلام نفسي عمري ما حسيته وفضلت أقول الحمد لله".

واختتمت: "أنا لسة مش مستوعبة وفاته، هو كان حد بيحب الحياة أوي، المرة الوحيدة اللي جالي فيها في الحلم قاللي اتبسطي، وهو بني آدم إيجابي".

وشاركت دينا الشربيني في رمضان 2023 بمسلسل "كامل العدد" وتكون من 15 حلقة وعرض عبر منصة "شاهد vip".

ومسلسل "كامل العدد" بطولة دينا الشربيني، شريف سلامة، آية سماحة، أحمد كمال، أحمد جمال سعيد، والفنانة القديرة إسعاد يونس.

فيما يعرض لدينا الشربيني في دور العرض السينمائية حالياً فيلم "يوم 13".

ويشارك دينا الشربيني في بطولة الفيلم كل من أحمد داوود، شريف منير، أحمد زاهر، جومانا مراد، محمود عبد المغني.