يوسف البسيوني يكشف تفاصيل كواليس مسلسل سفاح الجيزة |خاص
حوار - مرام اللبان
كشف الفنان يوسف البسيوني، لـ موقع "القارئ نيوز" عن تفاصيل كواليس مسلسل "سفاح الجيزة"، الذي شارك في البطولة النجم أحمد فهمي، وباقة متميزة من الفنانين.
وتحدث النجم يوسف البسيوني، عن تفاصيل دورهُ مع الفنان باسم سمرة، مؤكدًا: "هو أصَرّ يديني إحساس المشهد مظبوط، وشخصية مختلفة تمامًا عن توقعاتي".
إليكم نص الحوار:
تم ترشيحك لـ مسلسل سفاح الجيزة مع الفنان أحمد فهمي حدثنا عن دورك في العمل؟
- المخرج هادي الباجوري رشحني أعمل دور في مسلسل سفاح الجيزة، وأنا عامل دور مدير الفندق، بتحصل فيه جريمة من الجرايم اللي بيرتكبها السفاح، اللي هو أحمد فهمي.
وبيجي يحقق معايا الظابط المسؤول عن التحقيقات، باسم سمرة، وبيحصل تحقيق معايا وبيشوف الكاميرات حوالين الفندق، وبعدين بيطلع الغرقة يشوف الجريمة حصلت إزاي، وده كله مع مدير الفندق اللي هو أنا.
هل واجهت صعوبات أثناء التصوير؟
- بـ العكس خالص، أنا صورت على يومين والشغل بتاعي مكنتش فيه أي صعوبة، شركة "ذا بلانت برودكشن"، ده أول إنتاج ليها وهي شركة محترمة، وكان شغلي بليل وكانو يومين حلوين بجد.
ما أسم الشخصية التي تُجسدها؟
- أسم الشخصية مستر هشام مدير الفندق.
كيف كانت كواليس العمل مع النجم باسم سمرة والفنان أحمد فهمي؟
- الصراحة الفنان باسم سمرة أول مرة أشتغل معه، وهو فنان جميل وراقي جدًا جدًا، هحكي موقف حصل هو المفروض إحنا بنصور في الاوضه في الأوتيل اللي بيحقق فيه.
وإحنا خادنا أماكنا والحوار اللي هيدور بنا، وهو مش شرط يكون موجود يعني، بس هو فضل موجود معايا وقالي هديك الرد بتاعي ونفس الريأكشن وكل حاجة، كان ممكن يخلي مساعد المخرج يقعد مكانه يرد وخلاص، وأنا هقول الكلام بتاعي.
ولكن هو أصَرّ بصراحة عشان يديني إحساس المشهد مظبوط، وقعدنا نراجع مع بعض المشهد والكلام، وهو حد جميل وراقي وأنا بجد إتشرفت بالشغل معه، وفضل يهزر ويضحك، ومكنتش متوقع كدا بس طلع شخصيته مختلفة تمامًا.
بـ النسبة لـ أحمد فهمي مكنتش ليا مشاهد معه، بس قابلته في اللوكيشن، وهو أبن بلد وشخصية جدعة أوي، وبيفضل يهزر ويضحك، ولكن وقت الأكشن بيكون حاجة تانية خالص.
