نجأة مدير أعمال تامر حسني من الموت بعد حادث مروع بـ طريق العلمين.. تفاصيل

كتبت - مرام اللبان 

تعرض تامر يحيى، مدير أعمال النجم تامر حسني، لـ حادث سير مروع، أدى إلى تحطم سيارته بـ الكامل، وخصوصًا من الجزأ الأمامي، ونجأ منها بـ أُعجوبة. 

ونشر تامر يحيى، عبر حسابه الشخصي على الفيس بوك، تفاصيل الحادث الذي أدى لـ خسائر فادحة به وبـ السائق وبـ السيارة، حيث كتب: "مافيش كلام ينفع يتقال غير الحمد لله وبشكرك يارب علي كل حال".

وأضاف يحيى: "وفي كل حال ومن أجل كل حال و على كل تجربة صعبة، أنت بتحطني فيها علشان تفكرني دائما بوجودك في حياتي و بتكون رسالة سواء أنت بتحبني وبتفديني من حاجه أكبر كان ممكن تحصل ليا".

وإستكمل تامر يحيى: "أو لـ حد غالي عندي أو بتكون عايز تفكرني أنا فيه خطأ في حياتي محتاج أنتبه ليه، وأصلحه والحمد لله انا عندي إيمان شديد بـ تجارب ربنا، ونعمة الكبيره في حياتي". 

وأضاف:" أنا و محمد السواق الجميل اللي معايا ربنا نجانا من الموت إمبارح في حادثة من أكبر الحوادث اللي عملتها  في حياتي و احنا راجعين امبارح من العلمين الساعة 1.30 ظهرا فجأة ظهرت عربيه نقل قدامه واقفه في نص طريق وادي النطرون".

في الحارة الثالثة و هو كان قبلها بثواني بيحاول يشغل حاجه في الشاشة اللي قدامه فمكانش في كامل تركيزه علي الطريق و ما قدرش يتفاداها، العربية هربت من موقع الحادث بسرعه علشان عارف طبعا انه غلطان و انا و محمد ما قدرناش ننزل من العربية. 

غير بعد تقريبا ربع ساعه علشان الدم كان مغرق العربية والمشكلة اللي عقلي مش قادر يستوعبها انه ازاي مافيش ولا air bag فتحت ؟ انا مش هقدر اعدي الموضوع ده من غير ما الاقي اجابه فنيه ليه لاني لو عرفت انه ده خطا فني. 

في اللي برمج السوفت وير او ركب السينسورز انا مش هسيبه الا لما اسجنه لأنه كان حياتي هتنتهي أو أعيش بتشوهات في وشي طول عمري بسبب عدم فتح أي air bag. 

إصابة تامر يحيى بـ نزيف 

واستكمل: "أنا حصلي نزيف جامد بسبب كسر في مناخيري و قطع أخذ 8 غرز وقطع داخل الفم أخذ 3 غرز وشرخ في الساق وغالبا هعمل عمليه في مناخيري بعد ٥ أيام، محمد السائق الحمد لله كان حاطط حزام الامان فربنا انقذه وكل اللي فيه مجموعه كدمات". 

والنقل هرب من موقع الحادث و انا طلبت النجده و الاسعاف 17 مرة لكن للاسف كل مره يردوا طالبين مني تحديد موقعي أو اي علاقه مميزه في الصحراء وفي طريق صحراوي ودي يعني خليتني اتعصب عليهم لكن مافيش اي حاجه نفعت معاهم. 

طلبت من كل اللي كلموني من النجده انه حد يبعتلي اي رقم تليفون ابعتله عليه لوكيشن و اني بنزف نزيف جامد و محتاج اسعاف فورا لكن كان الرد في كل مره لا يا فندم ده مش اوبشن عندنا و قعدت ساعه و نص تقريبا بدون مساعده، ساعه و نصف و انا بنزف في طريق دولي. 

عدي عليا حوالي اكتر من 500 عربية، لكن للاسف ولا عربية فكرت تقف تشوف فيه ايه و غاليا من بشاعه منظر عربيتي الناس افتكرت اني اللي جواها اكيد ماتو لأنه طبيعي لو أي عربيه تانية مش بقوه Range Rover كان استحاله نحرج منها عايشين. 

اه على فكره الحادثه كانت الساعة 1.30 الظهر و بعد ما روحت المستشفي في وادي النطرون و بعدها مستشفى زايد التخصصي و بعدها مستشفي الرفيده و خلصت كل حاجه و عدي 8 ساعات لقيت تليفون من النجده بتاعت.

طريق العلمين الساعه 9.30 مساء بيقولي هو حضرتك عملت بلاغ عن حادثه من ساعه في طريق العلمين؟ طبعا لقيت نفسي بمنتهي الاحترام بضحك و بقفل السكة في وشه. 

وأضاف :" المفروض انه كان عندي رحلة لأمريكا النهاردة  لكن طبعا مش هقدر أسافر لمده 10 أيام و لغيت كل حاجة و كل الحجوزات و الطيران و الفنادق و كل حاجه و تم تأجيل كل حاجه لكن برضه الحمد لله. 

العربية دي من يوم ما اشتريتها و انا شايف حاجات بتحصلي فيها عمري ماشوفتها في 27 سنة شغل و ركوب عربيات، الساحل خلص و اللي شايف حياتنا على السوشيال ميديا بس ياريت ييجي يقضي معانا اسبوع بس و يشوف حجم الشغل اللي بنشتغله كل يوم.

وحجم الضغط النفسي و العصبي اللي احنا عايشين فيه و اللي مافيش حد يقدر عليه او يقدر سيتحمله و اني الخروج و السهر و السفر و الظهور في المجتمعات و الحفلات و السفر الكتير و الصور و الفيديوهات اللي بتشوفوها. 

ده جزء من شغلنا و جزء من حياتنا و جزء صعب قوي قوي قوي و ليه ضريبه جامده قوي بندفعها للاسف من وقتنا و فلوسنا و صحتنا و احيانا عائلاتنا علشان دي طبيعه شغلنا للاسف اللي بناكل ،منها عيش مش اكتر، الحمد لله علي كل شئ و يارب ما يوري حد منكم او حد غالي عليكم اللي انا شوفته النهاردة.