ريهام سعيد تهاجم بيومي فؤاد.. مش محترم الفلطسينيين ليه؟

كتبت - أميرة محمد 

هاجمت الإعلامية المصرية ريهام سعيد، الفنان المصري بيومي فؤاد، بسبب هجومه على الفنان محمد سلام، الذي انسحب من مسرحية "زواج اصطناعي" في موسم الرياض، بسبب الأحداث التي تشهدها غزة.

وقالت ريهام سعيد: "ما ينفعش تنتقد محمد سلام لإن موقفه موقف محترم، ومينفعش تغلط في اللي عمل الصح، بيومي فؤاد قال كلام مستفز، وأنا وضعي صعب لإن بطاقتي مكتوب فيها ممثلة، لكن إنت كده ضحكت على نفسك يا بيومي".

وتابعت ريهام سعيد: "والشعب السعودي على راسنا من فوق، إيه دخل ده في إنك رايح تقدم مسرحية تضحك؟ كلنا لنا الشرف نتصور مع السعودي والإماراتي واللبناني، إيه دخل ده في إن كان في مستشفى بينضرب وناس بتموت والدم سايح في كل حتة؟ إنت رايح تضحك بدليل إنك فنان كوميدي، وبدلت محمد سلام بكوميديان هو محمد أنور، وناس كتير شايفة مكانش يصح تضحك في الوقت ده، والأسبوع اللي محمد سلام إتكلم فيه كان وضع صعب جدا وما زال".

وأضافت: "يعني إنت احترمت ناس دفعت تذاكر علشان تروح مسرحية، ومش محترم الفلسطينيين ليه؟ 2 مليون ونص فلسطيني بيتقطعوا حتت مش محترمهم ليه ومش محترم شعورهم؟".

وقالت: "الفن لو مش هيقوم علي إننا نحس بالناس، ولو الفنان معندوش إحساس بالآخرين يبقي مش فنان".

حيث قام الفنان بيومي فؤاد بالهجوم علي الفنان محمد سلام بسبب انسحابه من مسرحية "زواج اصطناعي". 

وتحدث بيومي فؤاد علي المسرح عن موقف محمد سلام قائلًا: "من حقك إنك تعتذر عن المسرحية لكن مش من حقك إنك تغلط في فنك، إحنا مبنجيش علشان نضحك حضراتكم، إحنا بنقدم فننا المصري وانتوا بتحترمونا واحنا بنحترمكم جدا جدا".

وتابع بيومي فؤاد: "شيء عظيم إن الفنان يبقى ليه جمهور في كل الدول … شيء عظيم إني أخرج أتصور مع شاب سعودي أو سيدة سعودية وهي تعلم إن أنا مصري أنا بشرف بلدي، أنا فنان مصري وليا الشرف".