تامر أمين: الهدف الأساسي من المقاطعة هو استغلال الفرصة الذهبية للاقتصاد الوطني

كتبت - أميرة محمد

أشاد الإعلامي المصري تامر أمين بالمقاطعة التي يشهدها قطاع كبير من المصريين للمنتجات الإسرائيلية، وذلك خلال برنامجه "آخر النهار" على قناة "النهار".

وقال تامر أمين: "انتوا يا مصريين عاملين حاجة حلوة اوي ووطنية اوي وعربية اوي وذكية ومؤثرة ألا وهي المقاطعة، وأزعم إني كنت من اوئل الناس اللي قلت قاطعوا لكن مش بمنطق إني أوجع البراندات الأجنبية والشركات اللي بتدعم الكيان وبتبعتله فلوس ووجبات مش دا الهدف الأساسي". 

وأضاف: "هدفي الأساسي من المقاطعة هو استغلال الفرصة الذهبية دي من أجل إقامة اقتصاد الوطني على أسس سليمة، عشان ندعم المنتج المحلي الصناعي ويدخل في كل حاجة غذائي وملابس ومنسوجات وأجهزة كهربائية، انتوا عاملين حاجة عظيمة".

وتابع: "الهبة اللي حاصلة دي من كل المصريين تفرح، أوعوا يصعبوا عليكم.. المحلات الأمريكية بتنش والمصرية شغالة، الارزاق بتاع ربنا لأن الرزاق هو الله، وكل جنيه بتمنعه عن البراندات العالمية بيخسرهم في البورصة".

وكانت مقاطعة المنتجات الإسرائيلية قد شهدت تصاعداً في الآونة الأخيرة، وذلك تضامناً مع الشعب الفلسطيني، الذي يتعرض للاحتلال الإسرائيلي.

وذكر ان وجه الإعلامي تامر أمين انتقادًا للفنان بيومي فؤاد، وذلك على خلفية هجوم الأخير على الفنان محمد سلام، بعد اعتذار الأخير عن المشاركة في مسرحية "زواج اصطناعي" بموسم الرياض بالسعودية، بسبب استمرار العدوان الإسرائيلي على غزة.

وقال تامر أمين: "انت كنت عايز تدافع عن نفسك وعن المجموعة اللي سافرت واشتغلت، الزاوية الوحيدة اللي كان ينفع تتكلم فيها، إنك تقول إن ده شغلنا إحنا ملتزمين تجاه شغلنا، وإن ده مينفعش أبدًا تضامننا مع الشعب الفلسطيني الشقيق".

وأضاف: "أما إنك تطلع تضرب في محمد سلام، وتقول إنه أهان فنه، على فكرة أنا سمعت فيديو سلام ومفيهوش أي إهانة للفن، الراجل بيقول أنا مش قادر، هو حر".

وتابع تامر أمين: "قلت إحنا بنحب السعودية أوي، هو إيه دخل حب أو كره السعودية في الموضوع، القصة في الشغل، إيه علاقة السعودية؟! وإنك تقول إن ليك الشرف أنك تتصور مع مواطن سعودي، النجوم والفنانين كل الناس هي اللي ليها الشرف أنها تتصور معها".

وأضاف: "كمان تصريح إننا مش جايين عشان الفلوس، إيه دخل الفلوس في الموضوع، ذكر الفلوس هو اللي جابلك الكلام، كلنا بنشتغل عشان الفلوس هو في حد بيشتغل مجانا، والشغل عشان الفلوس الحلال مش عيب، ده شرف، بس اللي إحنا بنعمله لازم يكون رسالة، لكن السؤال الضحك إمتى؟! ووقته عامل إزاي؟!".