أحمد حلمي : كنت حاسس وأنا صغير إنى هابقى معروف
كتبت - فاطمة عاطف
كان الفنان "أحمد حلمي" ضيفًا في برنامج "Sold out" الذى يقوم بتقديمه الإعلامى المتميز "محمود سعد"،
على شاشة قناة Cbc، ومنصة Watch it الرقمية.
وتطرق "حلمى" فى الحديث عن بدايته قبل التمثيل، قائلاً: "مكنتش بفكر إنى أكون ممثل، ومثلت بالصدفة،
واه كنت حاسس وأنا صغير إنى هابقى معروف في أى وظيفة بشكل عام".
وأكمل "حلمى" : "والدتى بتعرف ترسم أوى وأنا أخدت منها الموهبة دى، وكنت شايف إن ممكن أبقى معروف في حتة الرسم،
وأنا في تانية ثانوى كنت بشتغل في مطبعة أثناء الدراسة وأنا في بنها، حاجات يتم طباعتها على التيشرتات".
فيلم عسل أسود
وذكر عند الحديث عن أعماله المتعلقة بقصص من حياته، قال : "فيلم عسل أسود منى زكى قالتلى إنى مش هاينفع أعمله
ومكنتش مقتنعة عشان إن ده شخص عايش في أمريكا لأكثر من 20 سنة، وأنا معيشتش هناك فمش هاعرف أعمله وكمان اللغة".
وتابع أحمد حلمي: "الفيلم كان المفروض يعمله عمر الشريف وأنا كنت هابقى موظف في شركة، ولكن لما قرأت السيناريو
فقلت لخالد دياب إيه رأيك نخليه أكتر عن الشباب ونلقى نظرة عن الشباب اللى هاجر بره،
وفكر فى الموضوع وقالى ممكن نعمل كدة وبدلنا السيناريو".
وأكمل" حلمى" : "كل شيء كان يقول إنى منفعش ولا شكل ينفع ولا لغة تنفع ولا تفكير شخص يكون عايش سنين في أمريكا،
وقعدت مع واحد مصر كان عايش في أمريكا اسمه آدم، واستعنت بيه في قراءة السيناريو واقوله على المواقف في السيناريو
واشوف رد فعله وموقفه إيه لو حصل له حاجة من الموجودة في السيناريو، وعشان كدة الفيلم بيعبر شوية عنى؛
لإنى عيشت بره مصر فترة كبيرة بعيد عن بلدى".
واستكمل الحديث قائلًا : "أما فيلم آسف على الإزعاج مرتبط شوية بمشاعري تجاه والدى الله يرحمه،
وحاسس إنى ملحقتش أقعد معاه وقت طويل، ويمكن لما بتمثل حاجة أنت عيشتها بتقدر تعبر عنها بصدق عشان بتكون عيشته وحسيته".
برنامج sold out
يعرض الموسم الجديد من برنامج sold out حصريًا على قناة "CBC" فى تمام التاسعة مساء يومى الخميس والجمعة من كل أسبوع.
ويستضيف البرنامج نخبة من كبار نجوم الفن فى مصر والوطن العربى، ويجوب خلاله "محمود سعد" فى جميع محافظات الجمهورية
بحثًا عن حكايات جديدة ومختلفة لأماكن وشخصيات ملهمة، بجانب تقديمه لعدد من الحفلات والليالى الغنائية المتميزة.