شريف منير يكشف كواليس الرحلة الأخيرة لطارق عبد العزيز: روحه طلعت قدام عيني

كتبت-زينب سعيد

صرح الفنان شريف منير في مداخلة هاتفية مع برنامج "الحكاية" مع الإعلامي عمرو أديب كواليس تصوير الفنان الراحل طارق عبد العزيز معه اليوم مسلسل "وبقينا اتنين".

وقال منير: "كان عندنا تصوير النهاردة في فيلا بأكتوبر الساعة 11 الصبح وطارق كان بيلعب شخصية شريف وكان موجود وكان في حالة تألق كبيرة ونفسية جيدة ونشيط وبيضحك وكل حاجة كانت ماشية بشكل طبيعي".

وأضاف: "في مشهد أنا بعمله هو وممثلة شابة بتيجي ترن جرس وهو بيفتح الباب وأنا بدخلهم الكادر وهو في وسطنا وبيسبنا وبيخرج وعملنا بروفة وصورنا أول مرة الشوت وكان واقف جنبي والمخرج قال عاوزين نعمله مرة تانية".

وتابع: "المخرج بيقول أكشن جه طارق نحيتي وشوفت لونه بيروح وسند عليا وأعد على كرسي وسند دماغه على واحد واقف قصادي وقالي مش قادر أقف على رجلي وجسمه أصفر وفجأة أبيض وجسمه سقع وحاولت أدلكله قلبه ولقيت عينه مرفوعة لفوق وفتحتله القميص وجيت اسمع ضربات قلبه مسمعتش حاجة".

وواصل: "قمنا بنقله للمستشفى ولما رحنا الدكاترة قالولنا أنه جه المستشفى متوفي وأنا شوفته وهو روحه بتطلع".

وأبدى عن حزنه لرحيل طارق عبدالعزيز قائلا: "كان دايما بيقول انا فرحان بالشخصية دي جدا والخبر نزل عليا كالصاعقة وحسيت بعدها أن الدنيا متستاهلش حاجة".

وتوفى طارق عبد العزيز بعد تعرضه لأزمة قلبية، عن عمر يناهز 55 عاما أثناء تصوير مسلسل "وبقينا اتنين"، ومن المقرر تشييع جثمان الفنان الراحل ظهر غد الإثنين من مسجد الشرطة في الشيخ زايد.