رانيا فريد شوقي تنعي أختها ناهد فريد شوقي برسالة مؤثرة

كتبت - أميرة محمد 

نعت الفنانة رانيا فريد شوقي، أختها المنتجة الراحلة ناهد فريد شوقي، برسالة مؤثرة نشرتها عبر حسابها على موقع التواصل الاجتماعي "إنستجرام".

وكتبت رانيا فريد شوقي: "للأسف بنعتاد الأحباب فى الدنيا  كأنهم خالدين في الدنيا زي ما نعتاد النعم كأنها مستمرة إلى الأبد و ده من عيوب البشر أختي الحبيبة الغالية ناهد انا بعتذر لك لأني اعتدك في حياتي يمكن خيالي كان أضعف من إني اتصور فراقك، يمكن خدتنا مشحانات الدنيا وربنا نور بصيرتنا ورجعنا لحضن بعض والحب اللي اتربينا عليه وحبنا لبابا كان دايما بيجمعنا يمكن لأني نسيت اننا بنكبر كلنا يمكن لأني جيت الدنيا لقيتك أختي الكبيرة القوية العنيدة اللي ماتعرفش حاجة إسمها استسلام وارادتها من حديد".

وأضافت: " قوتك كانت بطمني عليكي أنا مش عارفه أنا بكتب ايه بس اللي حساه أكبر بكتير من أي كلام مازلت مش مستوعبه ولما حد بيقول الله يرحمها بتخض في الفترة الأخيرة كنت بشوف فيكي بابا بكل حركاته وطريقة كلامه ونظراته وهزارك و قولت للأحفاد اللي ماشفوش جدهم ناهد بقت نسخه من جدكم لما تشفوها كأنكم شفتوه سبحان الله".

وتابعت: "والغريب اني من الشخصيات اللي بتخاف تدخل علي حد متوفي لانه بيبقي آخر انطباع بيفضل في الذاكره عن الشخص لكن لما دخلت و شوفت وشك مبتسمه كأنك نايمة و بتحلمي حلم جميل حسيت انك شوفتي فريد ابنك بيستقبلك وخدك لحبايبك بابا وطنط هدي ومها أختنا ده تفسيري لابتسامتك الهادية الجميلة الواضحة أوي اللي هونت علينا كلنا فراقك واللي مش هتفارقني اللي باقي من عمري".

وأنهت كلامها قائلة: "كنتي راضية بكل اقدار الله و مسلمه أمرك لله إلي ان نلتقي يا أختي سلميلي علي بابا و قوليله الحياة من غيرك مش حياة و نفسي يجيلي في الحلم بقاله فترة غايب عني هتوحشيني اوي يا حته من ابويا و من قلبي".

يذكر أن المنتجة ناهد فريد شوقي رحلت عن عالمنا صباح أول أمس الثلاثاء عن عمر يناهز 73 عاما، وتم تشييع جثمانها في نفس اليوم بمسجد الشرطة بالشيخ زايد بحضور عدد كبير من نجوم الفن، ومن المقرر أن تتلقى أسرة الراحلة العزاء مساء اليوم الخميس بعد صلاة المغرب في قاعه الوهاب من مسجد الشرطة بالشيخ زايد.