حنان مفيد فوزي: انتشار فيديوهات والدي على السوشيال ميديا دليل على نجاحه
كتبت - أميرة محمد
كشفت حنان مفيد فوزي، ابنة الإعلامي مفيد فوزي، أن والدها كان يرغب في إجراء حوار مع الفنانة عبلة كامل، لكنه لم يحالفه الحظ.
وتحدثت حنان مفيد فوزي في تصريحات تلفزيونية، عن تداول فيديوهات لوالدها حتى الآن على جميع مواقع التواصل الاجتماعي.
وقالت: "بابا مكنش ليه علاقة بالسوشيال ميديا أبدًا، دائمًا كنت أنا إللي بنزله استوري وأقوله لازم نعمل كده علشان نبقى متواجدين، وكان بيبقى مبسوط لما بيلاقي الناس بتجيب سيرته وموجود، وفي ناس كتير جدًا عملوا له فيديوهات على التيك توك منهم الفنانة هنا الزاهد، وتواجده لحد دلوقتي يدل على نجاحه".
أوضحت حنان مفيد فوزي: "لما كان بيتم دعوته في أي برنامج كان بيطلب أرقام بسيطة جدًا مقارنة باللي موجودة دلوقتي، ولما كنت بقوله يا بابا فلان طلب كذا، كان بيأكدلي إن قيمة الإنسان في وجوده ودي حقيقة فعلًا، الناس دائمًا بتعمل سيرش عليه في ماسبيرو زمان، حتى الأطفال دلوقتي عارفاه وبتتفرج عليه".
وتابعت: "بابا مش محتاج إني أعمل ليه فيلم تسجيلي، دائمًا لما بقلب على السوشيال ميديا بلاقي بيظهر ليا، وقدر يعمل حوارات مع فنانين كتير منهم أحمد ذكي اللي مكنش بيوافق يعمل حوارات نهائي، بالإضافة إلى الفنان عمرو دياب، لكن الفنانة إللي كان نفسه يعمل معاها حوار ومقدرش هي الفنانة عبلة كامل، كان مؤمن بيها جدًا، في ناس بتقدر تطلع تتكلم عن نفسها لكن عبلة كامل كانت شايفة إن وجهتها في أدوارها إللي بتقدمها، وعمرو دياب كان ذكي ولما طلع عرف يطلع مع مين".