يسرا تكشف أسرار عن مسيرتها الفنية

كتبت - أميرة محمد 

كشفت النجمة يسرا، خلال الماستر كلاس الخاص بها والمقامة ضمن فعاليات مهرجان الجونة السينمائي، عن علاقتها بالكاتب الكبير وحيد حامد والمخرج الراحل يوسف شاهين، ومدى تأثيرهما عليها خلال مسيرتها الفنية.

وقالت يسرا عن علاقتها بوحيد حامد: "كنت لسه في بداية المعرفة بوحيد، والحقيقة لقيته شخص تشتاقله طول الوقت إنك تقعدى معاه وتشكيله همومك ومشاكلك وهو بيقدر يحلها وبيفكر دايمًا في الواحد".

وتحدثت يسرا عن علاقتها بالمخرج يوسف شاهين، وقالت: "يوسف شاهين أول مرة قابلته قلت له مش هعرف أشتغل معاك علشان خفت من الفشل وانه هيكون ليه أثر كبير عليا".

وتابعت: "يوسف شاهين طلب مني أغير لون شعري من البلوند إلى الأسود، ورفضت في البداية، ولكنه صمم، ولما ادانى "ورق حدوتة مصرية" قريته 10 مرات مفهمتوش خالص، وهو الأول كان عارض عليا الأول دور الأخت وأنا قلت له إنى عاوزة دور مراته ورحت معتذرة له وعملت حاجات علشان يكرهنى وميكلمنيش تانى".

وواصلت: "بعد 3 شهور وانا كنت قاعدة عند خالتى ونايمة، لقيت واحد داخل عليا الأوضة (يوسف شاهين) وبيصحينى فجأة ويقولى قومى علشان عندنا تصوير الفيلم، والبسى عقبال ما أعملك القهوة، وكمان فتح الدولاب ونقى كل اللبس بتاع الشخصية فى الفيلم، وقلت له حاضر يا أستاذ وعملت الفيلم بنفس الملابس اللى اختارها".

وحضر الماستر كلاس الذي أقيم بحضور عدد كبير من الفنانين، منهم ليلى علوي، مروان حامد، هنا شيحة، هدى المفتي، نسرين طافش، أحمد حاتم، المخرجة إيناس الدغيدي، الكاتبة انجى علاء، المخرجة مريم أبو عوف، الكاتب محمد أمين راضى، المطرب أبو وزوجته، المخرج يسرى نصر الله، عمرو منسى، أمير المصرى، سلوى محمد على.

وتقام دورة استثنائية من مهرجان الجونة السينمائي، بعد تأجيلها عن الموعد المحدد في أكتوبر الماضي بسبب أحداث غزة، بعد إضافة برنامج مُهدى إلى السينما الفلسطينية، إلى جانب برنامج المهرجان، ليتضمن عرض مجموعة أفلام عن فلسطين بالتعاون مع مؤسسة الفيلم الفلسطيني.