كريم قاسم يتحدث عن تجربته في مسلسل "زينهم"
كتبت - أميرة محمد
تحدث الفنان كريم قاسم عن أحدث أعماله الفنية مسلسل "زينهم" بالتوازي مع عرض آخر حلقاته، اليوم الخميس، في برنامج "عيش صباحك" على "نجوم إف.إم" مع الإعلامية فانا إمام.
حيث قال كريم قاسم عن تجربته في المسلسل: "زينهم أحسن حاجة حصلت لي السنة دي ودي حاجة كويسة الواحد يقفل بيها السنة".
وتحدث عن شخصية "دكتور جيمي" التي يقدمها في المسلسل، قائلاً: "الشخصية متلبساني أوي وأي حد من أصحابي بيشتكي لي من حاجة في جسمه بقيت بقول له وريني كده وأقعد أفسر له وأتحقق من الموضوع.. كنت متخيل الموضوع هيبقى أصعب من كده لكن اللذيذ إن الكاتب طبيب فكان في مصطلحاته وتفسيره ساعدنا، وكان فيه أصدقاء دكاترة ساعدونا وبرده من كتر الفرجة على شخصيات الدكاترة قبل كده".
وأضاف: "التركيز في المسلسل أكتر على القضايا والجانب الاجتماعي للشخصيات والمخرج بذكاء حاول يتفادى مناظر الجثث والإصابات علشان يبقى مناسب للأطفال والعيلة مع إنه كان يقدر يدخل في التفاصيل".
وأستكمل كلامه قائلًا: "أول ما قريت الورق حسيت إن جيمي ده دوري ومكتوب لي لأني كنت متخيل هعمل فيه إيه، واللي اتنفذ كمان عدى اللي كنت متخيله بعد التعاون مع المخرج اللي كان فاهم جدًا وكمان الشغل مع أحمد داوود زي لعب الكورة وبنساعد بعض وكنا داخلين ننبسط وكنا محضرين كويس".
وتابع: "كنت خايف طبعًا، ولأول وهلة دخول المشرحة رغم إنها ديكور لكن كأنها مشرحة حقيقي وفيها قبضة، ومع أول جثة وتصوير كان الموضوع بيخض لحد لما اتعودنا بعد كده".
ويشارك في بطولة المسلسل أحمد داود، سلمى أبو ضيف، كريم قاسم، وأحمد الرافعى، ومحمد أبو داود، ويارا جبران، وعماد رشاد، هناء الشوربجى، سلوى محمد على، انجى أبو السعود، أسامة أبو العطا، حمدى هيكل، بسمة نبيل، نورا مهدى، نسمة بهى.
ومن تأليف محمد سليمان عبدالمالك، وإنتاج أروما، وإخراج يحيى إسماعيل.