السيسى يوجه بإجراء حوار وطنى خاص بالاقتصاد.. حل مشكلة الدولار من خلال زيادة موارده

كتبت-زينب سعيد

دعا الرئيس عبدالفتاح السيسي، خلال احتفالية ذكرى عيد الشرطة الـ 72، إلى إجراء حوار فيما يخص الاقتصاد، قائلا:"محتاجين نعمل حوار أعمق وأشمل فيما يخص الاقتصاد".

أضاف الرئيس :"بسمع كتير من المحليين الاقتصاديين بيتكلموا فى القنوات وبيكتبوا فى الجرايد.. فيه فرق كبير إنك تقول رأى وإنك تنفذ الرأى مع رأى عام.. مع ناس.. مع دولة.. فيه ظروف كتير قوى بتتحط فى الاعتبار".

وقال السيسي: أنا بشغل 6 ملايين.. قولولى انتو يا مصريين، احنا كلنا في مركب واحد، أخلي ده يقفل ويروح.. حتى لو هديله 500 جنيه أو 1000 جنيه، في حين الراجل اللى شغال في الدولة بيعمل مبلغ أكبر من كده بكتير، وعايش، هتقولى بس الدنيا غالية.. بس كلنا نقدر نعيش.. لو نستحمل هنعيش وهنكبر ونتجاوز المشكلة".

وفيما يخص الدولار، قال: "فيه رؤية طرحتها الحكومة.. شوفوا دايما كان الدولار بيمثل مشكلة كل كام سنة في مصر طيب ليه ؟، الدولة المصرية مش بس الإنفاق اللى عملناه أو الحرب ضد الإرهاب، إنما بقدم خدمات وببيعها بالجنيه واضطر أجيبها بالدولار هديكوا مثال، سلع أساسية بمليار دولار في الشهر قمح ذرة فول صويا طيب بيعه للناس بالجنيه طيب عاوز وقود قد ايه ؟ مليار دولار تاني، شهريا".

وتحدث عن احتياجات الدولة الدولارية، قائلا: "النهادرة محطات الكهرباء بتاخد غاز يسوى تقريبا مليار دولار شهريا.. 3 مليارات دولار مش هقدر ما أوفرهمش لأنها حاجات أساسية.. أنا مش داخل فى نقاش.. بحاول أشرح لكم حجم التحدى اللى عايشنه حتى من قبل 2011.. الأرقام دى إذا مكنتش الدولة المصرية يعملوا على زيادة موارد الدولار وتكون أكثر أو تساوى انفاقنا.. إللى بيجلنا من بيع منتجات أو التصدير أو قناة السويس أو السياحة.. لو ما حققناش المعادلة دى هتكون المشكلة دى.. هى دى الحكاية كلها اللى عاملة".