"حب البنات" يعيد البهجة إلى قلب تامر حبيب في عيد الحب

كتبت - أميرة محمد 

عرض فيلم "حب البنات" في سينما زاوية، بمناسبة عيد الحب، بعد مرور 20 عامًا على عرضه الأول، ليعيد إحياء مشاعر الحب والبهجة لدى السيناريست تامر حبيب.

عبر تامر حبيب عن سعادته الغامرة وكتب علي حسابه الشخصي على موقع" فيسبوك": "لسة راجع من سينما زاوية المحببة لقلوب كل اللي بيحبوا السينما كانوا عاملين عرض لفيلم حب البنات بمناسبة عيد الحب ومشكورين جدًا طلبوا مني اروح احضر الفيلم وعملولي لقاء مع الجمهور بعد الفيلم ما خلص".

وتابع: "الجمهور اللي كان مالي كل كراسي القاعة ومافيش كرسي فاضي كانت طبعًا أغلبيتهم العظمي من البنات ويمكن 90% منهم كانوا اطفال أو لسة ماتولدوش لما الفيلم اتعرض اول مرة في 2004". 

وأضاف: "أنا راجع من العرض ده طاير من السعادة والبهجة وحاسس بنشوة لا تضاهيها نشوة الشباب كانوا بيسمعوا الحوار مع الفيلم وهو شغال، وكانوا بيصفقوا مع ظهور الممثلين كأننا في مسرح  و بيغنوا ويرقصوا مع كل كلمة في كل اغنية في الفيلم وفاجئوني بتصفيق مدوي بعد الفيلم ما خلص كأنهم كانوا في مسرحية لعادل امام".

وأستكمل قائلًا: "مهما وصفت، مش هقدر اعبر عن شعوري اللي حسيته من اول الفيلم ما بدأ لغاية دلوقتي حالًا وروح وبهجة وطاقة الشباب وهما بيحاوروني بعد الفيلم كانوا مخليني عايز اسجد شكرًا لربنا  علي إنه انعم. عليا النهاردة بإحساس ماحستوش من زمااااان".

وتابع: "أنا كنت قاعد وسط مجموعة من الشباب فاتحين عليا هويس حب وبهجة بجد ماتتوصفش…. شكرًا جدًا لكل واحدة وواحد خلوني احس بسيل المشاعر ده، وشكرًا لصاحبة فكرة عرض الفيلم النهاردة من اسرة سينما زاوية، وفي عيد الحب بعد عشرين سنة من عرضه".

وانهى كلامه قائلًا: "وشكرًا يا سينما انك عندك كل هذا السحر… وشكرًا يا امي علي دعائك ليا ان ربنا يحبب فيا خلقه، واحب اطمنك يا ماما ان ربنا استجابلك من وسع… والف شكر وحمد ليك ياارب".