"الشهرة دين في رقبتنا ومسئولية كبيرة"..تعرف على أبرز وآخر تصريحات يسرا

كتبت - جهاد عامر

حلت الفنانة يسرا ضيفة على برنامج abtalks مع الإعلامي الإماراتي أنس بوخش، وتحدثت فيه عن سلبيات وإيجابيات الشهرة، وأكدت أن عالم هوليوود أصعب من عالمنا العربي، كما كشفت عن سبب حبها للسينما ورغبتها في التمثيل.

وقالت يسرا خلال اللقاء: "لما كنت بروح السينما مع والدتي كنا بنشوف 3 أفلام أساسيين كل ليلة من بلاد مختلفة، ومن هنا حبيت السينما وبقيت مؤمنة بها ولغة الفن دي لمست قلبي، وقولت عايزة أكون على الشاشة دي؛ لأنها اللغة الوحيدة اللي مش محتاجة ترجمة".

وأشارت يسرا إلى أهميةالعمل بجهد: "لو حد بيسعى للشهرة فقط هيقدر يحققها في ثانية بدون مجهود، ولكنها عمرها ما هتدوم لأنك لازم تشتغل بـ جهد وتحب مهنتك مش الشهرة، ولازم تحترم اللي بتعمله عشان يقدر يمنحك شيء جميل ويترد ليك ولازم تعرف إزاي تستخدم الشهرة في الشيء الصح وأنك تخدم المجتمع مش عشان النجاح ولا الفلوس، ولازم تتجنب الجزء السئ من الشهرة، وفي النهاية مش هنقدر نرضي الجميع والمشكلة أن الجمهور بينسى أننا بشر".

وقالت معبرة عن أضرار الشهرة: "الشهرة دين في رقبتنا ومسئولية كبيرة، فيه ناس قد الشهرة وفيه ناس مش قدها ولما الشهرة بتيجي لهم بيفهموها وفيه ناس لما تجيلهم بتلغبطهم وتجننهم، وأحيانا بكون مُنهكة من الشهرة والناس وبفصل عن العالم تماما، وأقعد في البيت لوحدي وبدخل في حالة خاصة بيا زي القوقعة وبنعزل، ومن هنا بقدر أشحن طاقتي من جديد وأكمل إنما مقدرش أستمر على طول بدون ما أبتعد فترة للاستراحة".

كما تطرقت يسرا للحديث عن الفرق بين عالم الشهرة في الوطن العربي والشهرة في هوليوود، قائلة: "العالم في هوليوود أصعب بكتير من عالمنا؛ لأنهم شغالين بسرعة وكأنهم آلة، وبيتسنزفوا من طاقتهم ومش سهل تكون نجم كويس برا، لكن هنا أحنا بيحترمونا ويحبونا والناس بيكبروا معانا، أحنا أرحم كتير".