ريهام عبد الغفور: سنة 2022 عاملة زي الغرفة 207 واتعلمت إن مفيش حاجة بدوم

كتبت- هيام علي

علقت النجمة ريهام عبد الغفور، على سنة 2022 بأنها مثل مسلسلها الجديد "الغرفة 207"، كما أعربت عن سعادتها بنجاحاتها خلال الفترة الأخيرة.

قالت الفنانة ريهام عبد الغفور، خلال مداخلة هاتفية ببرنامج "خلاص صحينا" عبر إذاعة ميجا fm: "ربنا كرمني كتير قوي في سنة 2022، وكل الأعمال دي متصورتش ورا بعض كان بينهم فترات، ومكنتش متخيلة إن كلهم يتعرضوا ورا بعض كده ويحققوا النجاح ده".

وتابعت: "في الأول كنت قلقانة وخايفة إن الناس تزهق مني لما تشوفني كتير ورا بعض، بس لما المسلسلات اتعرضت ورا بعض وكل مسلسل بدور مختلف، عملوا ردود أفعال جماهيرية وإيجابية بشكل مكنتش متوقعاه".

وأردفت ريهام: "طول الوقت ببقى حريصة أشتغل على نفسي وأحاول أتغير وأقدم حاجات مختلفة للجمهور، وعارفة إن دوام الحال من المحال، لو النجاح ده كنت حققته وأنا صغيرة كنت هتعود عليه ومحسش بقيمته زي دلوقتي، لما كبرت فهمت إن يوم واحد يقدر يغير كل حاجة".

قالت ريهام عن سنة 2022: "عاملة زي الغرفة 207 محدش خرج منها زي ما دخلها، وأنا خرجت منها متعلمة إن مفيش حاجة بتدوم، ومفيش أي ضمانات لأي حاجة، ودايمًا بدعي ربنا إنه يغير حالنا للأحسن".

وأكدت ريهام: "خرجت من 2022 بشخصيات كتير جدًا، أهمهم المخرجين اللي اشتغلت معاهم واللي استفدت من كل واحد فيهم، لأن كل واحد كان ليه طريقته ومدرسته الخاصة، وكمان كل زمايلي اللي اتبسطت بالشغل معاهم".

آخر أعمال الفنانة ريهام عبد الغفور

حققت الفنانة ريهام عبد الغفور العديد من النجاحات خلال الفترة الماضية بعد عرض أكثر من عمل لها، أولهم مسلسل "منعطف خطر" مع باسل الخياط، باسم سمرة، ومن إخراج السدير مسعود.