عمر مرموش: لما بدخل الملعب بتحول وبتعلم من محمد صلاح

قال عمر مرموش، نجم منتخب مصر ونادي آينتراخت فرانكفورت، خلال حواره مع الإعلامية إسعاد يونس، المذاع على قناة dmc عن دوره فى الملعب عقب لمس الكرة، قائلا: "لما بدخل الملعب بتحول، بكون بره لذيذ وطيب وفى الملعب بتغير، ومحبش أخسر وعاوز كل اللى حوليا مركزين ومصحصحين، وبحاول أكون إيجابي ومفيد مع الفرقة".

تصريحات عمر مرموش مع صاحبة السعادة

وعن لاعبه المفضل على البلاى ستيشن قال عمر مرموش،: "بلعب بلاي ستيشن بنفسى فى النادى اللى بلعب فيه، وبقول لنفسى فى اللعبة إيه ده متشوت عدل، وبكلم نفسى أنت كويس هتجيب جون ومش مشكلة فى الفرصة اللى ضاعت هتيجى فرصة تانى".

وأضاف عمر مرموش: "اللاعب بيكون مضغوط من أهله واصحابه وكل الناس، والكورة يوم فوق ويوم تحت، وبحط لنفسى مستوى معين أثبت عليه، وبفكر بنفسى أنا مين وعملت إيه ووصلت لدا كله إزاى؟، وديما بحط لنفسى مستوى معين علشان أقدم ماتش كويس".

أشادات عمر مرموش بالفرعون محمد صلاح

أشاد عمر مرموش، نجم منتخب مصر ونادى آينتراخت فرانكفورت، بالنجم المصرى محمد صلاح لاعب المنتخب المصرى وليفربول الإنجليزى، قائلا:"دا بيؤكد أن مصر بها مواهب ولاعبين كبار، وعلاقتى بـ"مو" كويسة واحنا أصحاب وباخد من خبراته، وماشى بشكل كويس، وفرحان إن فى منتخب واحد زى صلاح فى منتخب بلدى وصل لمكانة كبيرة وفى نفس الوقت عاوز أعمل مكانة لنفسى".

وأضاف عمر مرموش، خلال حواره مع الإعلامية إسعاد يونس، المذاع على قناة dmc، أن محمد صلاح أحسن لاعب جه فى أوروبا وله تاريخ كبير، وأنا عاوز أعمل قصة لوحدى وبتعلم منه وديما بيساعدنى وإزاى أطور من نفسى وشرف لى أتعامل وأتعلم من صلاح".

وتابع عمر مرموش: "صلاح ساعدنى لما جيت المنتخب، وقالى اللى هيفرق معاك لو اشتغلت "مينتال"، وهى أن اللاعب بيمر بضغوطات كثيرة وعليه أن يتعامل مع هذه الضغوطات بطريقه تفيده، وميتكبرش ويكون شايف نفسه لانه هيفرق معاه فى الملعب علشان يكون شخص مكتمل، وعدم السماح لأى شيء يشتته، وبنصح كل لاعب بان ينظر لهذا الأمر وميتأثر بحد".

عبّر عمر مرموش، نجم منتخب مصر ونادي آينتراخت فرانكفورت، عن حبه لشقيقه، قائلا: "أخويا مثلى الأعلى، وكنت بقلده، وكان بيفرجنى دايما على فيديوهات كورة، وكان مهتم بالكورة وكان حريف، وسريع وقوى".

وأضاف عمر مرموش،: "وفى الكورة كنت بحب رونالدينيو، وكان لاعب كبير ومثلى الأعلى".

ملابس عمر مرموش

وتابع: "ملابسى ملهاش علاقة بموديل معين، وبحب المزيكا وباسمع كل الأنواع وبشغل الأغانى فى النادى منها أغنية (آه يا قلبى) للمطرب حكيم وبشغل أغانى شعبى، وبيرقصوا عليها فى النادى، وبديهم تقاليد مصرية وأغانى، وبحب السينما لكن مش بروحلها كتير وبلعب رياضة تانية"، وخلال الحلقة وبجو ملىء بالفكاهة والضحك ومن باب الدعابة وافقت إسعاد يونس وعمر مرموش على تقديم مرموش أفلام فى السينما خلال الفترة المقبلة.

كشف عمر مرموش، نجم منتخب مصر ونادي آينتراخت فرانكفورت، خلال حواره ببرنامج "صاحبة السعادة" مع الإعلامية إسعاد يونس، المذاع على قناة دي إم سي، إنه بعد فترة أداها داخل نادي آينتراخت فرانكفورت قاربت سنة ونص بنى قدرات وحقق أرقاما، موضحا أن معظم لعب الفريق يعتمد على منطقة منتصف الملعب ولكن هدف الفريق الوصول إلى الإمام وتحقيق الأهداف.

وأضاف عمر مرموش، أنه آخر نقطة في الفريق وأظهر أنه على قدر المسئولية في هذا المركز، قائلا: "أنا آخر نقطة في الفرقة وأنا اشتغلت عليه ووصلت له وبينت لفرقتي إنى على قدر المسئولية وأنا كنت رايح ألعب ناحية الشمال، وكان في لاعب قبل الفترة الانتقالية ما تنتهى مشى من النادى".

وتابع: "النادي بقى أمام أمر واقع ولعبوني في مكانه والولد ده كان عامل موسم حلو والضغط كله كان عليا، ومكنش في فرصة أخذ وقتي واتأقلم، ولعبت رقم 9 وأنا كنت بلعب في هذا المركز لكن في النادي اللي قبله كنت بلعب جنب شمال، واللي حصل بعد فترة الفرقة كسبت الثقة فيا".

تحدث عمر مرموش، نجم منتخب مصر ونادي آينتراخت فرانكفورت، عن تجربة الاحتراف ليست سهلة، وكل لاعب يريد خوض هذه التجربة عليه معرفة ذلك، موضحا أن اللاعب في تجربة الاحتراف يسافر لتحقيق حلم ويدخل مجتمعا ويجد صعوبة في التأقلم معه، ولو تعرض للعرقلة في الكرة أيضا يصبح الموضوع أكثر صعوبة.