نجوى إبراهيم تعلن تعافيها من السرطان

كتبت - أميرة محمد 

أعلنت الإعلامية نجوى إبراهيم، الشهيرة بـ "ماما نجوى"، تعافيها من إصابتها بالسرطان، وذلك خلال تقديمها برنامجها "بيت العز" على إذاعة نجوم FM.

وقالت نجوى إبراهيم: "فرحانة ومبسوطة الحمدلله بعد أربع أو خمس شهور قلق حابة أفرحكم وهي جت كده من عند ربنا وبيجيلي كم دعوات كتير منكم اعتبروني من النهارده لسة وجه جديد معاكم".

وأضافت: "أنا هسكت كفاية إنى أقولكم بحبكم من قلبي حقيقي وبعزكم وبحترم الجمهور اللي بدأ معايا وأنا كنت لسة صغيرة شبر ونص لغاية دلوقتي، هبدأ النهاردة حياتي معاكم واعتبروني وجه جديد".

وأكدت نجوى إبراهيم أنها دخلت في حالة انهيار بسبب الدعوات التي وصلت لها بعد تصريحاتها عن إصابتها بالسرطان، حيث قالت: "حسيت إني غلطت جدًا لما اتكلمت، وكلامي مكنش شكوى، ولما روحت قعدت يومين أعيط من الدعوات اللي وصلتني، ده أنا لو هيقطعوا إيدي متهيالي مش هتقطع من كتر الدعوات فعلًا رب ضارة نافعة".

وتابعت: "قعدت أقول ليه أنكد عليكم؟ ما كل واحد فيه اللي مكفيه، وليه أطلع أقول كده؟، ما أنا بقالي شهرين بجري في موضوع مرضي مع ولادي وعيلتي".