رساله السيسي للمصريين: كل حاجة تهون الإ بلدنا.. هنروح من ربنا فين

كتبت-زينب سعيد

ووجه الرئيس عبد الفتاح السيسي، رسالة إلى الشعب المصرى خلال احتفالية عيد الشرطة قائلا: "مصر أمانة يا مصريين.. كل حاجة تهون إلا بلدنا.. يعني مش هنأكل ونشرب.. غالية ومش متوفرة إيه يعني.. ربنا مدينا مثال حي لناس في قطاع غزة مش عارفين ندخلها الأكل الأساسيات شوية قمح ودقيق وزيت علشان لقمة عيش.. بالمناسبة كنا بندخلها قبل الأزمة الحالية 600 شاحنة لغزة يوميا.. احنا مش وصولنا في أعلى تقدير إلى 200 – 220 شاحنة.. طب الناس دي عايشة ازاى".

وأكد الرئيس أن الدولة المصرية لم تغلق معبر رفح على الإطلاق من أجل منع دخول المساعدات إلى قطاع غزة، قائلا: "بقول الكلام ده.. اتقال كلام كتير علي أن مصر هي السبب.. هقول كلمة صعبة.. أنا هروح من ربنا فين؟ّ!.. ولو انا السبب فى منع دخول لقمة عيش لغزة.. اروح من ربنا فين؟!.. معبر رفح مفتوح على مدار 24 ساعة في 7 أيام في 30 يوم.. الإجراءات اللى بتم من الجانب الأخر "إسرائيل" علشان نقدر ندخل الحاجة هى السبب.. وده شكل من أشكال الضغط اللى بيمارسه الجانب الإسرائيلى على القطاع".

وأضاف: "لا يمكن نقفل معبر رفح أمام عبور المساعدات لغزة.. ولازم تكونوا متأكدين من كده.. ومش لازم يطلع بيان هيئة الاستعلامات ولا الخارجية والداخلية ولا المخابرات العامة.. احنا مش بنعمل كده".

واختتم السيسي كلمته قائلا: " كل حاجة تهون.. المهم سلامة مصر.. وعاوز أأقولكم كل اللى مر وبنعاني منه بفضل الله وهو يسمع ويرى هينتهي إن شاء الله.. كل سنة وانتم طيبين.. يا رب احفظ بلدنا واحميها واكفيها من فضلك شكرا جزيلا والسلام عليكم ورحمة الله".