تامر حسني يساند محمد سامي: هزعل منك لوهتمشي محبط وأنت أنجح حد

حرص النجم تامر حسني على توجيه رسالة للمخرج محمد سامي بعد إعلانه لاعتزال الإخراج التليفزيوني، يحثه فيها على العودة عن قراره.

رسالة تامر حسني لمحمد سامي

كتب تامر حسني ردا على قرار محمد سامي: "أوعى تكون عايز تبعد عشان أي إحباط جايز يكون فعلاً في بعض المشاهد اللي الناس إنتقدتها و أنا شخصياً إستغربتها شويه و قولت جوايا أنك مش محتاج تعملها أصلاً لأن عندك الحقيقي والأهم بس على رأيك الفنون جنون أحياناً فكره مجنونه تنال الإعجاب و فكره لأ، بس ده ميخليناش ننسى إنها بعض مشاهد مش بعض أعمال لأنك بالفعل المخرج الوحيد في تاريخ مصر اللي مفشلش ولا مره".

وتابع تامر حسني: يمكن الحظ محالفكش أوي في عمل ولا 2 على مدار 14 سنة، ودي حاجه مينفعش الجمهور ينساهالك، أنت قدمت مسلسل "آدم" اللي جمع كل المصريين وكل الوطن العربي يتفرجوا عليه زي ماتشات الكوره، بسبب أنه أتكلم عن قضية تخص كل الوطن، وكان بداية لصورة جديدة أول مرة كانت بتتقدم في مصر، وبعدها "سبق الإصرار" و"حكاية حياة" اللي كانوا نقلة كبيرة في ديكورات الدراما المصرية وبعدين "الأسطورة" و"البرنس" و"جعفر العمدة"، اللي حققوا نجاحات ساحقة، وكانوا أعلى نسبة مشاهدات في الدراما بشكل عام، وبعدهم "نعمة الأڤوكاتو" و"إش إش" و"سيد الناس" اللي برضو كل واحد فيهم يا أعلى مشاهدة يا تاني أعلى مشاهدة.

وأضاف تامر حسني: هزعل منك لو هتمشي محبط وأنت أنجح حد… الشجرة الخضراء الجميلة ساعات بيطلعلها ورق أصفر بسيط عادي بيتقص وبتفضل شجره كبيرة وجميلة وده التطوير الطبيعي للبني آدم، واللي بيمر بيه أي ناجح بيطور وعنده شخصية، بدليل مسلسلاتك بيتقال عليها مسلسلات محمد سامي، وتركيز الناس معاك دليل على حبهم لأعمالك، ورغم إن بعضهم بينتقدوها بس متابعينها حرف حرف، ونقدهم ليك بيبقى على قد حجمك وهي دي ضريبة الناجحين الكبار.

واستكمل تامر حسني نصيحته لمحمد سامي كاتبا: "سافر وكمل حلمك وأنت منتصر بتاريخك وأوعى تُحبط، وأنا عارف إن محمد سامي اللي أكتشفته أنا وقدمته للصناعة وهو عنده 27 سنة، لايمكن هيتهز، ممكن يزعل يومين ويراجع نفسه في مشاهد، أنا مبسوط منك أنك بمنتهى الشجاعة الأدبية أعتذرت على تقديمها، خد راحه شويه وإرجع أقوى من الأول، وأنا واثق من اللي هتسافر عشانه أنه قرار هيضيف نقلة كبيرة لمشوارك أوعى تخلي الزعل من بعض المشاهد ينسيك أنت قدمت ايه للدراما".

واختتم تامر حسني تعليقة كاتبا: "ياريت قبل ما نقسوا على سامي بالطريقة دي، نفتكر هو أمتعنا سنين قد ايه بمسلسلاته، وأنا ذكرتها كلها عشان لو حد ناسي أفكره، وعشان لو هو محبط يجمد تاني، ربنا ينور طريقك وترجع أقوى وأقوى من أي وقت، واثق فيك يا حبيبي، وأنا هفضل أخوك الكبير، وفي ضهرك إن شاء الله طول العمر يا بطل".

وقرر المخرج محمد سامي إعلان اعتزاله الإخراج التليفزيوني عبر منشور على الفيسبوك ليبدأ مرحلة جديدة في حياته لم يكشف عنها بعد.

بيان محمد سامي عن اعتزال الإخراج

وكتب المخرج محمد سامي عبر حسابه بموقع Facebook بيانا يعلن فيه اعتزاله، جاء فيه: "وداعا الدراما التلفزيونية، السنه دي كانت آخر أعمالي التلفزيونية، واللي فيها بودع المسلسلات، رحلة طويلة حولي 15 سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير و مع شركات و قنوات كلها مهمة، و كان دايما الجمهور بيشجعني، سواء بردود الأفعال أو بتصويته ليا في الجوائز، و أي نجاح حققته كان بفضل ربنا و الجمهور".

وتابع محمد سامي: يمكن المقربين ليا عارفين إني واخد القرار ده من فترة وهو إعتزال الإخراج التلفزيوني و لكن كنت بنتهي من إلتزامات موقعة مع شركات و نجوم و الحمد لله إنتهيت منها وكان أخرها 2025، معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي و من الوقوع في فخ التكرار و دائرة المتوقع والملل، والوحيد القادر علي الدوام هو الله وحده، الحمد لله أخر عملين ليا إش إش وسيد الناس حققوا نجاح أنا سعيد بيه.

وأضاف محمد سامي: كل يوم بلدي العظيمة مصر بتطلع صناع جداد موهوبين ومثقفين ويقدروا يقدموا أفضل من اللي قبلهم وهنفضل طول الوقت بنقدم أعمال مصرية يلتف حولها الجمهور العربي، بشكر كل حد ساعدني في الرحلة وبشكر كل زميل منافسته كانت دافع للتميز.

اعتذار محمد سامي للجمهور

ووجه محمد سامي اعتذاره للجمهور عن أي مشهد لم يلق استحسانهم، كاتبا: بعتذر عن أي مشهد قدمته أثناء الرحلة ولم يلقي إستحسان الجمهور أو إعجابهم في الأخر الفنان دايما بيجرب و الفنون جنون زي ما بيقولوا، أدعولي الفترة الجاية عندي سفر خارج مصر لفترة عامين بتعلم فيهم حاجة جديدة بدرسها، حاجة كان نفسي أتعلمها من زمان و أجلتها كتير لحد مالقيت نفسي بكبر و خايف يفوت العمر قبل ما أعمل حاجة نفسي فيها، مقتنع إن الشخص يقدر في أي وقت يقرر يوقف حاجه بيحبها عشان يعمل حاجة تانية بيحبها برضه و عايز يجربها بس محتاج عيلة تسانده علي إتخاذ قراره، كل التوفيق لكل زمايلي و بحبكم و بشكركم علي سنين المنافسة الجميلة اللي عملت أسمائنا كلنا وأتمني لنفسي التوفيق في الخطوة الجديدة.

مشوار محمد سامي

يذكر أن محمد سامي قدم العديد من المسلسلات الدرامية الناجحة خلال 15 عاماً، وبدأ مشواره الفني بإخراج مسلسل "آدم" الذي قام ببطولته النجم تامر حسني وعرض في شهر رمضان 2011، وبعدها قدم أعمالا درامية ناجحة مع الفنانة غادة عبد الرازق، من بينها مسلسل "حكاية حياة" و"مع سبق الإصرار"، وتعاون بعدها مع النجم محمد رمضان في عدد من المسلسلات من بينها "الأسطورة" عام 2016، و"البرنس" و"جعفر العمدة" الذي قدمه عام 2023، وفي رمضان 2024، قدم "نعمة الأفوكاتو" من بطولة زوجته النجمة مي عمر، وهذا العام شارك في رمضان بمسلسلين هما "سيد الناس" لعمرو سعد و"إش إش " لمي عمر.