مي عمر تعلق على قرار اعتزال محمد سامي: لا علاقة له بالانتقادات

علقت الفنانة مي عمر على قرار زوجها المخرج محمد سامي اعتزال الإخراج التليفزيوني، مؤكدة أنه اتخذ هذا القرار قبل فترة ولا علاقة له بالانتقادات التي وجهت لأعماله.

لقاء مي عمر مع عمرو أديب

وأضافت مي عمر خلال لقائها في برنامج "الحكاية" مع عمرو أديب عبر قناة mbc مصر: "محمد واخد القرار من قبل رمضان هي الناس مش فاهمة هو عمل مسلسلات كتير والمسلسلات مرهقة جدا وكلها ناجحة، لما بعمل مسلسل بخلصه ببقى تعبانة ومش قادرة اشتغل أو اقرأ سيناريوهات، هو السنة دي عمل مسلسلين وكان كتير جدا عليه هو واخد القرار من قبل رمضان وقال أنا محتاج أريح وأخد إجازة وأرجع تاني".

وقالت مي عمر: "الموضوع ملوش علاقة باللي حصل المسلسلين مكسرين الدنيا ومخلصين رمضان الأول والتاني على شاهد، أنا ساعات كتير كنت بقوله متشتغلش رمضان اللي جاي وريح، المسلسل مش تصوير بس هو بيقعد يكتب ويحضر ويقعد مع الممثلين ويتابع ديكور وموسيقى ومونتاج، إحنا كممثلين الشغل بالنسبة لينا 3 أو 4 شهور هو بالنسبة ليه الشغل 9 شهور أو سنة مش بيلحق يعمل حاجة".

واختتمت مي عمر كلامها: "هو عنده خطوة مهمة شغال عليها ويعمل الحاجات اللي نفسه فيها ويرجع تاني، هي خطوة فنية".

وقرر المخرج محمد سامي إعلان اعتزاله الإخراج التليفزيوني عبر منشور على الفيسبوك ليبدأ مرحلة جديدة في حياته لم يكشف عنها بعد.

بيان محمد سامي عن اعتزال الإخراج

وكتب المخرج محمد سامي عبر حسابه بموقع Facebook بيانا يعلن فيه اعتزاله، جاء فيه: "وداعا الدراما التلفزيونية، السنه دي كانت آخر أعمالي التلفزيونية، واللي فيها بودع المسلسلات، رحلة طويلة حولي 15 سنة، قدمت فيهم كل اللي قدرت عليه لإسعاد الجمهور العربي، وحققت بفضل ربنا نجاحات مع نجوم كتير و مع شركات و قنوات كلها مهمة، و كان دايما الجمهور بيشجعني، سواء بردود الأفعال أو بتصويته ليا في الجوائز، و أي نجاح حققته كان بفضل ربنا و الجمهور".

وتابع محمد سامي: يمكن المقربين ليا عارفين إني واخد القرار ده من فترة وهو إعتزال الإخراج التلفزيوني و لكن كنت بنتهي من إلتزامات موقعة مع شركات و نجوم و الحمد لله إنتهيت منها وكان أخرها 2025، معنديش حاجة أكتر أقدر أقدمها في التلفزيون، وخايف من تشبع الجمهور من أسلوبي و من الوقوع في فخ التكرار و دائرة المتوقع والملل، والوحيد القادر علي الدوام هو الله وحده، الحمد لله أخر عملين ليا إش إش وسيد الناس حققوا نجاح أنا سعيد بيه.

وأضاف محمد سامي: كل يوم بلدي العظيمة مصر بتطلع صناع جداد موهوبين ومثقفين ويقدروا يقدموا أفضل من اللي قبلهم وهنفضل طول الوقت بنقدم أعمال مصرية يلتف حولها الجمهور العربي، بشكر كل حد ساعدني في الرحلة وبشكر كل زميل منافسته كانت دافع للتميز.

اعتذار محمد سامي للجمهور

ووجه محمد سامي اعتذاره للجمهور عن أي مشهد لم يلق استحسانهم، كاتبا: بعتذر عن أي مشهد قدمته أثناء الرحلة ولم يلقي إستحسان الجمهور أو إعجابهم في الأخر الفنان دايما بيجرب و الفنون جنون زي ما بيقولوا، أدعولي الفترة الجاية عندي سفر خارج مصر لفترة عامين بتعلم فيهم حاجة جديدة بدرسها، حاجة كان نفسي أتعلمها من زمان و أجلتها كتير لحد مالقيت نفسي بكبر و خايف يفوت العمر قبل ما أعمل حاجة نفسي فيها، مقتنع إن الشخص يقدر في أي وقت يقرر يوقف حاجه بيحبها عشان يعمل حاجة تانية بيحبها برضه و عايز يجربها بس محتاج عيلة تسانده علي إتخاذ قراره، كل التوفيق لكل زمايلي و بحبكم و بشكركم علي سنين المنافسة الجميلة اللي عملت أسمائنا كلنا وأتمني لنفسي التوفيق في الخطوة الجديدة.

مشوار محمد سامي

يذكر أن محمد سامي قدم العديد من المسلسلات الدرامية الناجحة خلال 15 عاماً، وبدأ مشواره الفني بإخراج مسلسل "آدم" الذي قام ببطولته النجم تامر حسني وعرض في شهر رمضان 2011، وبعدها قدم أعمالا درامية ناجحة مع الفنانة غادة عبد الرازق، من بينها مسلسل "حكاية حياة" و"مع سبق الإصرار"، وتعاون بعدها مع النجم محمد رمضان في عدد من المسلسلات من بينها "الأسطورة" عام 2016، و"البرنس" و"جعفر العمدة" الذي قدمه عام 2023، وفي رمضان 2024، قدم "نعمة الأفوكاتو" من بطولة زوجته النجمة مي عمر، وهذا العام شارك في رمضان بمسلسلين هما "سيد الناس" لعمرو سعد و"إش إش " لمي عمر.