عمر مرموش: أنا بلعب باسم بلدى وبمثل 120 مليون مصرى على ظهرى

قال عمر مرموش، نجم منتخب مصر، خلال حواره مع الإعلامية إسعاد يونس، المذاع على قناة dmc عن انتقاله إلى نادي آينتراخت فرانكفورت، قائلا: "أنا بلعب فى النادى من سنة ونص.. والسنة دي ماشيين بشكل كويس والفرقة بتلعب بطريقة مختلفة.. وده ساعدنى إنى أظهر بالمنظر ده.. وحققت أرقاما كويسة السنة اللى فاتت، والسنادى أفضل".

عمر مرموش: منتخب مصر بالنسبة ليا حاجه كبيرة

وأضاف عمر مرموش،: "منتخب مصر بالنسبة ليا حاجة كبيرة، وكلنا هدف واحد وهو تمثيل مصر بشكل كويس ونحطها فى مكانة عالية، وأنا بلعب باسم بلدى ومش عاوز حد يكسبنا ويضحك علينا كمان.. بمثل 120 مليون مصرى وشايل اسم مصر على ظهرى.. وده بيفرق معايا، وكلنا عندنا نفس الروح والهدف أننا نكسب بلدنا".

عمر مرموش بحاول أبسط الناس بأقل حاجة

وتابع عمر مرموش: "خلال بطولة أفريقيا الماضية أول ما وصلت البلد اللى هنلعب فيها كانت درجة حرارتى كبيرة.. وقلت للدكتور هلعب يعنى هلعب حتى ولو درجة حرارتى 80 درجة.. وحصلت على أدوية، وأنا بمثل بلدى ولما هنزل الملعب هعمل كل حاجة".

أكد عمر مرموش، نجم منتخب مصر ونادي آينتراخت فرانكفورت، عن سعادته خلال محاولة إسعاد الجماهير المحبين له، قائلا: "بحاول أبسط الناس بأقل حاجة لما يتصوروا معايا، والصورة بتفرق معاهم والكلمة الحلوة بردو بتفرق".

وأضاف عمر مرموش، خلال حواره مع الإعلامية إسعاد يونس، ببرنامج "صاحبة السعادة" المذاع على قناة dmc: "قدمت مبادرة (باصيها لغيرك) لمساعدة المصريين لتوفير أحذية رياضية للشباب فى النوادى لينزلوا بها الملعب زى كل الناس التانية ويوصلوا لحلمهم، وجمعت 12 ألف حذاء جديد ووزعتها على المصريين".

قال عمر مرموش، نجم منتخب مصر ونادي آينتراخت فرانكفورت، خلال حواره مع الإعلامية إسعاد يونس، المذاع على قناة dmc عن دوره فى الملعب عقب لمس الكرة، قائلا: "لما بدخل الملعب بتحول، بكون بره لذيذ وطيب وفى الملعب بتغير، ومحبش أخسر وعاوز كل اللى حوليا مركزين ومصحصحين، وبحاول أكون إيجابي ومفيد مع الفرقة".

تصريحات عمر مرموش مع صاحبة السعادة

وعن لاعبه المفضل على البلاى ستيشن قال عمر مرموش،: "بلعب بلاي ستيشن بنفسى فى النادى اللى بلعب فيه، وبقول لنفسى فى اللعبة إيه ده متشوت عدل، وبكلم نفسى أنت كويس هتجيب جون ومش مشكلة فى الفرصة اللى ضاعت هتيجى فرصة تانى".

وأضاف عمر مرموش: "اللاعب بيكون مضغوط من أهله واصحابه وكل الناس، والكورة يوم فوق ويوم تحت، وبحط لنفسى مستوى معين أثبت عليه، وبفكر بنفسى أنا مين وعملت إيه ووصلت لدا كله إزاى؟، وديما بحط لنفسى مستوى معين علشان أقدم ماتش كويس".

أشادات عمر مرموش بالفرعون محمد صلاح

أشاد عمر مرموش، نجم منتخب مصر ونادى آينتراخت فرانكفورت، بالنجم المصرى محمد صلاح لاعب المنتخب المصرى وليفربول الإنجليزى، قائلا:"دا بيؤكد أن مصر بها مواهب ولاعبين كبار، وعلاقتى بـ"مو" كويسة واحنا أصحاب وباخد من خبراته، وماشى بشكل كويس، وفرحان إن فى منتخب واحد زى صلاح فى منتخب بلدى وصل لمكانة كبيرة وفى نفس الوقت عاوز أعمل مكانة لنفسى".

وأضاف عمر مرموش، خلال حواره مع الإعلامية إسعاد يونس، المذاع على قناة dmc، أن محمد صلاح أحسن لاعب جه فى أوروبا وله تاريخ كبير، وأنا عاوز أعمل قصة لوحدى وبتعلم منه وديما بيساعدنى وإزاى أطور من نفسى وشرف لى أتعامل وأتعلم من صلاح".

وتابع عمر مرموش: "صلاح ساعدنى لما جيت المنتخب، وقالى اللى هيفرق معاك لو اشتغلت "مينتال"، وهى أن اللاعب بيمر بضغوطات كثيرة وعليه أن يتعامل مع هذه الضغوطات بطريقه تفيده، وميتكبرش ويكون شايف نفسه لانه هيفرق معاه فى الملعب علشان يكون شخص مكتمل، وعدم السماح لأى شيء يشتته، وبنصح كل لاعب بان ينظر لهذا الأمر وميتأثر بحد".

عبّر عمر مرموش، نجم منتخب مصر ونادي آينتراخت فرانكفورت، عن حبه لشقيقه، قائلا: "أخويا مثلى الأعلى، وكنت بقلده، وكان بيفرجنى دايما على فيديوهات كورة، وكان مهتم بالكورة وكان حريف، وسريع وقوى".

وأضاف عمر مرموش،: "وفى الكورة كنت بحب رونالدينيو، وكان لاعب كبير ومثلى الأعلى".